სამარშრუტო ტაქსების ხაზების მფლობელებისთვის ალტერნატიული მარშრუტი მიუღებელია
თბილისი.22.08.05.მედიანიუსი. თბილისში სამარშრუტო ტაქსების ხაზების მფლობელებმა და მძღოლებმა საპროტესტო აქციით თბილისის მერიის შენობიდან ი. ჯავახიშვილის სახელობის თბილისის სახელმწიფო უნივერსიტეტის მაღლივ კორპუსთან გადაინაცვლეს.
ისინი თბილისის ცენტრალურ მაგისტრალზე სამარშუტო ტაქსების მოძრაობის აკრძალვას აპროტესტებენ.
22 აგვისტოდან კოსტავასა და მელიქიშვილის ქუჩებზე, რუსთაველის და ჭავჭავაძის გამზირებზე მოხვედრა მხოლოდ ავტობუსებით გახდება შესაძლებელი.
თბილისის მერიამ სამარშრუტო ტაქსების მძღოლებსა და ხაზების მფლობელებს ალტერნატიული მარშრუტი და მოძრაობის განრიგი წარუდგინა. აქციის მონაწილეები შეთავაზებული წინადადებით უკმაყოფილონი არიან და საპროტესტო აქციების გაგრძელებით იმუქრებიან.