პატიმარმა ქალებმა შიმშილობა შეწყვიტეს
თბილისი.13.10.05.მედიანიუსი. ქალთა საპყრობილეში მოშიმშილე პატიმრებმა საპროტესტო აქცია შეწყვიტეს. ეს გადაწყვეტილება მათ პარლამენტის ადამიანის უფლებათა დაცვის კომიტეტის თავმჯდომარის ელენე თევდორაძესთან შეხვედრის შემდეგ მიიღეს. პარლამენტარმა განსასჯელ ქალებს მათი საქმეების სასამართლო განხილვის დაჩქარების საქმეში დახმარება აღუთქვა.
28 სექტემბერს სასჯელაღსრულების #5 ქალთა საპყრობილეში ოცდახუთმა პატიმარმა შიმშილობის აქცია ამნისტიის მოთხოვნით დაიწყო.
აქციის დაწყების დღიდან მოშიმშილეები დაწესებულების სამედიცინო პერსონალის მუდმივი მეთვალყურეობის ქვეშ იყვნენ. დაწესებულების ადმინისტრაციის წარმომადგენლები ინტენსიურად ცდილობდნენ პატიმრები შიმშილობის შეწყვეტაზე დაეთანხმებინათ. საპატიმროს ადმინისტრაციის მცდელობით, შიმშილობა პატიმართა უმრავლესობამ სხვადასხვა დროს შეწყვიტა. ბოლო ხუთმა ქალბატონმა შიმშილობის შეწყვეტის გადაწყვეტილება 12 ოქტომბერს, ელენე თევდორაძესთან შეხვედრის შემდეგ მიიღო.
საპყრობილის ექიმების განმარტებით, აქციაში მონაწილეების ჯანმრთელობის მდგომარეობა დამაკმაყოფილებელია.