ბოლნისელები სასმელ წყალს ითხოვენ
ბოლნისი.19.02.06.მედიანიუსი. დღეს ბოლნისში ადგილობრივმა მოსახლეობამ საპროტესტო აქცია გამართა. აქციის მონაწილეები ბოლნისის გამგებლისაგან გიორგი არევაძე ელექტროენერგიის მიწოდებას და სუფთა წყლით მომარაგებას ითხოვენ.
აქციის მონაწილეთა განცხადებით‚ მათ დაბინძურებული წყალი მიეწოდებათ. საპროტესტო აქციას კონსერვატორთა ლიდერი კობა დავითაშვილიც დაესწრო.
როგორც დავითაშვილმა „მედიანიუსს“ განუცხადა‚ ბოლნისში სრული უკანონობა სუფევს. „მოსახლეობა იხდის ელექტროენერგიის გადასახადს და ამის მიუხედავად, დენი მაინც არ მიეწოდებათ. ეს დანაშაულია. ასევე ცნობილია‚ რომ ადგილობრივი ხელისუფლება ყველანაირად ზღუდავს საპროტესტო აქციების ჩატარებას და ამაზე სისხლის სამართლის უკანონო საქმეებიცაა აღძრული“‚ _ განაცხადა დავითაშვილმა.