11 თებერვალს, ქ. თელავში, კომპანია „მაგთის“ ოფისის გვერდით მდებარე ჩინური მაღაზიის გამყიდველი დააყაჩაღეს. როგორც თვითმხილველებმა „ადამიანის უფლებათა ცენტრს“ აცნობეს, დაზარალებულმა მაშინვე მიმართა საპატრულო პოლიციის კახეთის დეპარტამენტს და თელავის რაიონულ პოლიციას, მაგრამ მის განცხადებას სამართალდამცავები აგდებით მოეკიდნენ.
დაყაჩაღების ფაქტზე ამ დრომდე სისხლის სამართლის საქმე არ აღძრულა. თელავის პოლიციის უფროსი ბაადურ გულიაშვილი მომხდარს საერთოდ უარყოფს. ჩინელები კი შევიწროებაზე საუბრობენ.