საქართველოს სახალხო დამცველის ოფისის მონიტორინგისა და გამოძიების დეპარტამენტის უფროსი გიგა გიორგაძე მიიჩნევს, რომ გათვალისწინებული უნდა იყოს მასობრივი ინფორმაციის საშუალებების მუშაობის სპეციფიკა, სასამართლო პროცესებზე.
ამის შესახებ გიორგაძემ სამაუწყებლო კომპანია „რუსთავი 2“- თან ინტერვიუში განაცხადა, ციხის ბუნტის ორგანიზებაში ბრალდებულთა პროცესზე, 27 მარტს მომხდარ ინციდენდთან დაკავშირებით. მოსამართლე მაია თეთრაულმა მხოლოდ იმიტომ გააძევა დარბაზიდან ტელეკომპანია „მზის“ ჟურნალისტი იმედა დარსალია, რომ მან დარბაზს გარეთ ვიდეოკასეტის ასისტენტისთვის მიწოდება სცადა.
მოსამართლის გადაწყვეტილებით აღშფოთებულმა ჟურნალისტებმა სოლიდარობა გამოუცხადეს კოლეგას და პროტესტის ნიშნად სასამართლოს დარბაზი დატოვეს.
გიგა გიორგაძის განცხადებით, ჟურნალისტებმა თავისი საქმიანობის განხორციელებისას უნდა დაიცვან სასამართლოში დადგენილი წესები, მაგრამ ამავე დროს, გათვალისწინებული უნდა იყოს ჟურნალისტების მუშაობის სპეციფიკა, რომელიც დამახასიათებელია ინფორმაციის დამუშავებისა და მიწოდების დროს.
წყარო: media.ge