ადამიანის უფლებათა ცენტრი 2018 წლის საპრეზიდენტო არჩევნებს დააკვირდება

ადამიანის უფლებათა ცენტრი მონიტორინგს განახორციელებს 2018 წლის საპრეზიდენტო არჩევნებზე პროექტის „2018 წლის საპრეზიდენტო არჩევნებისა და სისხლის სამართლის საერთაშორისო სასამართლოს გამოძიების მონიტორინგი საქართველოში“ ფარგლებში.

ადამიანის უფლებათა ცენტრის დამკვირვებლები 2018 წლის საპრეზიდენტო არჩევნებს კახეთის, შიდა ქართლისა და ქვემო ქართლის რეგიონებში დააკვირდებიან, მათ შორის, ეთნიკური უმცირესობებით დასახლებულ და გორის მუნიციპალიტეტის კონფლიქტისპირა სოფლებში. 

პროექტის მიზნებიდან გამომდინარე, ადამიანის უფლებათა ცენტრი, მონიტორინგის გზით, შეაფასებს საქართველოს საარჩევნო პროცესის შესაბამისობას საერთაშორისო და ადგილობრივ სტანდარტებთან, ხელს შეუწყობს საზოგადოებრივი ცნობიერების ამაღლებას რეგიონებში მიმდინარე პოლიტიკურ პროცესებზე და  შერჩეულ საარჩევნო უბნებში უზრუნველყოფს საარჩევნო პროცესის  გამჭვირვალობას. 

საარჩევნო დღის განმავლობაში დამკვირვებელთა მიერ მოწოდებული ინფორმაცია აღმოჩენილი დარღვევების შესახებ ოპერატიულად გამოქვეყნდება ორგანიზაციის ინტერნეტ-გაზეთში - www.humanrights.ge ქართულ და ინგლისურ ენებზე და მიეწოდება სხვადასხვა მედიასაშუალებებს.

არჩევნების შემდეგ, საარჩევნო პროცესის დაკვირვებისას აღმოჩენილ დარღვევებზე და სხვა მიგნებებზე ადამიანის უფლებათა ცენტრი გამოაქვეყნებს ორენოვან ანგარიშს. მასში დასკვნის სახით შევა რეკომენდაციები როგორც ცენტრალური საარჩევნო კომისიის, ასევე საქართველოს პარლამენტისა და შესაბამის უწყებების მიმართ. 

2018 წლის საპრეზიდენტო არჩევნების მონიტორინგს ადამიანის უფლებათა ცენტრი ნორვეგიის ჰელსინკის კომიტეტის მხარდაჭერით განახორციელებს.