07:09, Sunday, 08.12.2019
YouTube
Twitter
Facebook
RSS
ქართული English

პორტალი ადამიანის უფლებების შესახებ

Go
გაფართოებული ძიება

ჟურნალისტი პოლიციას სასამართლოში უჩივის

05.12.2007
ჟურნალისტი გელა მთივლიშვილი საქართველოს შინაგან საქმეთა სამინისტროს კახეთის მთავარ სამხარეო სამმართველოს სასამართლოში უჩივის. სასარჩელო განცხადებით, იგი სამმართველოს ხელმძღვანელობისგან საჯარო ინფორმაციის დაუყოვნებლივ გაცემას ითხოვს.

"2007 წლის 7 სექტემბერს წერილობითი განცხადებით მივმართე შს კახეთის სამხარეო მთავარ სამმართველოს და მოვითხოვე ყოველკვირეულად მოეწოდებინათ ინფორმაცია ფოსტით, ფაქსით ან ელექტრონული ფოსტის მეშვეობით, კახეთის რეგიონში მომხდარი კრიმინალური ფაქტების შესახებ. კერძოდ, სად, როდის და რა ინციდენტი მოხდა, დაიწყო თუ არა გამოძიება, სისხლის სამართლის კოდექსის რომელი მუხლით და ვის მიერ მიმდინარეობს მოკვლევა"- ამბობს მთივლიშვილი.

მისივე თქმით, 2007 წლის 3 ოქტომბერს ჩაბარდა შს კახეთის სამხარეო სამმართველოს 25 სექტემბრის წერილი, რომელსაც ხელს სამმართველოს უფროსის მოადგილე გოჩა თედიაშვილი აწერს. წერილში მითითებულია, რომ საქართველოს ზოგადი ადმინისტრაციული კოდექსის მე-3 მუხლის მე-4 პუნქტის "ა" ქვეპუნქტის შესაბამისად, განმცხადებელს უარი ეთქვა წერილში მოთხოვნილი ინფორმაციის მიწოდებაზე.

საქართველოს ზოგადი ადმინისტრაციული კოდექსის მე-3 მუხლის მე-4 პუნქტი: "ამ კოდექსის მოქმედება არ ვრცელდება აღმასრულებელი ხელისუფლების ორგანოთა იმ საქმიანობაზე, რომელიც დაკავშირებულია: ა/. დანაშაულის ჩადენის გამო პირის სისხლისსამართლებრივ დევნასთან ან სისხლის სამართლის საქმის წარმოებასთან.

ჟურნალისტის განცხადებით, მისი მოთხოვნა ინფორმაციის მიწოდებასთან დაკავშირებით, არის ადმინისტრაციული ფუნქცია, რომლის განხორციელებაც არანაირად არ არის დაკავშირებული დანაშაულის ჩადენის გამო პირის სისხლის სამართლებრივ დევნასთან და სისხლის სამართლის საქმის წარმოებასთან, ასევე ოპერატიულ და სხვა სახის სამძებრო ღონისძიებებთან. "თანაც, მოპასუხის მიერ მითითებული მუხლის ქვეპუნქტში საუბარია "ორგანოს საქმიანობაზე" და არა ორგანოზე. მე მიმაჩნია, რომ შს სამინისტროს კახეთის მთავარი სამხარეო სამმართველოს უარი, ჩემს მიერ მოთხოვნილი ინფორმაციის გაცემაზე ეწინააღმდეგება საქართველოს კონსტიტუციას, ასევე საქართველოს ზოგადი ადმინისტრაციული კოდექსის მუხლებს ინფორმაციის თავისუფლების შესახებ. ინფორმაცია რომ მიმეღო, ტელეფონით დავუკავშირდი შს სამინისტროს ადმინისტრაციის ხელმძღვანელს შოთა ხიზანიშვილსაც, რომელიც დამპირდა, რომ სამხარეო სამმართველოს მისცემდა მითითებას, გაეცათ ინფორმაცია, თუმცა უშედეგოდ. ამიტომ მივმართე სასამართლოს, რომელიც უკვე შეუდგა სასარჩელო განცხადების განხილვას"- აღნიშნავს მოსარჩელე.

მოპასუხე მხარეს სასამართლოსთვის, ჟურნალისტის სარჩელზე შესაგებელი ან სხვა რაიმე სახის განმარტება არ წარუდგენია. უფრო მეტიც, განმწესრიგებელ და მოსამზადებელ სხდომას სამმართველოდან არავინ დაესწრო. სამაგიეროდ, როგორც მთივლიშვილი ამბობს, მას სხვა საქმის თაობაზე მოუხდა თედიაშვილთან დაკავშირება, რა დროსაც საუბარი ინფორმაციის დაბლოკვასაც შეეხო: "ვერ გაიგეთ, რომ ჩვენგან ინფორმაციის მოთხოვნის უფლება არ გაქვთ? სამინისტროს წარმომადგენელი ხარ, პრეზიდენტის ადმინისტრაციის თუ რა, რატომ უნდა მოგაწოდო ინფორმაცია? რამდენი ჟურნალისტიც მომთხოვს, ყველას უნდა მივაწოდო ინფორმაცია? რაზე ლაპარაკობ?"- განაცხადა თედიაშვილმა.

იურისტ ლია ხუროშვილის განმარტებით, ის იცნობს ჟურნალისტის სარჩელს და დარწმუნებულია, რომ მოპასუხე მხარე პროცესს წააგებს. "საქართველოს კონსტიტუციის 41-ე მუხლის I პუნქტით, საქართველოს მოქალაქის კონსტიტუციური უფლებაა მიიღოს ინფორმაცია და გაეცნოს ოფიციალურ დოკუმენტს, თუ ისინი არ შეიცავენ სახელმწიფო, პროფესიულ ან კომერციულ საიდუმლოებას. საჯარო ინფორმაციის ხელმისაწვდომობისა და ღიაობის პრეზუმფციას აწესებს ასევე ზოგადი ადმინისტრაციული კოდექსის 28 მუხლი. ეს მოთხოვნები შს სამმართველომ დაარღვია. მათ ინფორმაციის გაცემაზე უარის თქმის შესახებ აქტიც კი არ აქვთ გამოცემული, რაც ასევე დარღვევაა"- ამბობს იურისტი.

ჩვენ შევეცადეთ დავკავშირებოდით შს სამინისტროს კახეთის მთავარი სამხარეო სამმართველოს ხელმძღვანელობას. გვინდოდა მათგან მიგვეღო პასუხი რატომ ბლოკავენ ინფორმაციას, რომელიც კანონით საჯაროა, მაგრამ სამმართველოს უფროსმაც და მისმა მოადგილემაც ჩვენი სატელეფონო ზარები უპასუხოდ დატოვეს.

თელავის რაიონული სასამართლოს მოსამართლე ნათელა ჯაშიაშვილი საქმეს არსებითად 13 დეკემბერს განიხილავს.

თამარ მახარაშვილი, კახეთი


Print Send to Friend Send to Facebook Tweet This
დატოვეთ თქვენი კომენტარი
თქვენი სახელი:
თქვენი კომენტარი:

ქართულად
დამცავი კოდი: Code
სხვა სიახლეები
გამოკითხვა
არიან თუ არა ამჟამად საქართველოში პოლიტიკური პატიმრები?
დიახ არა არ ვიცი

ბლოგი

გორაშვილი vs ნაჭყებია
ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის ლექტორმა, გიორგი გორაშვილმა ამავე ფაკულტეტის სტუდენტს ბუბა ნაჭყებიას ფეისბუქის დახურულ ჯგუფში გინების გამო უჩივლა.
ვრცლად...
სიკვდილით სავსე ქალაქი
უგზო-უკვლოდ დაკარგულები - „არ დამივიწყო!“
არქივი
  

       

რედაქტორის აზრი

ხელისუფლებისგან მივიწყებული ვეტერანები
ყოველწლიურად მცირდება მეორე მსოფლიო ომის მონაწილეთა რაოდენობა. მათ შესახებ კი საზოგადოება მხოლოდ 9 მაისს იღებს ინფორმაციას, როდესაც ომის ვეტერანები, ტრადიციულად, გამარჯვების პარკში იკრიბებიან
ვრცლად...
უიმედოთა სოფელი
რა დაემართა სამართლიანობის აღდგენის ოცნებას
არქივი
თემები
კატეგორიები

Copyright © 2004 - 2019 HRIDC