არასამთავრობოები თამაზ ბაკურიძეს იცავენ

არასამთავრობოები თამაზ ბაკურიძეს იცავენ

თბილისი.19.11.04.მედია-ნიუსი. არასამთავრობო ორგანიზაციები - საქართველოს დემოკრატიული პრინციპების და ადამიანის უფლებების დაცვის კავშირის, ადამიანის უფლებების დაცვის ახალგაზრდული კავშირის, ადამიანის უფლებების დაცვის ცენტრისა და ფორსმაჟორული და სხვა სიტუაციებში დაზარალებულთა კავშირის წარმომადგენლები მოითხოვენ, აჭარის ტელევიზიის ყოფილი ხელმძღვანელის თამაზ ბაკურიძეს წინასწარი აღმკვეთი ღონისძიება შეეცვალოს უფრო მსუბუქი აღმკვეთი ღონისძიებით და მოხდეს სახელმწიფოსა და ბრალდებულს შორის საპროცესო შეთანხმება.

„ჩვენ მიმართვა შევიმუშავეთ გენერალური პროკურორის ზურაბ ადეიშვილისა და ბათუმის საქალაქო სასამართლოს სახელზე, სადაც ვითხოვთ, რომ მოხდეს საპროცესო შეთანხმება. გაუგებარია, მაშინ როცა ასლან აბაშიძე მეზობელ რუსეთში თავისუფლად დაიარება, რატომ არის დაკავებული თამაზ ბაკურიძე, რომელიც ვარდების რევოლუციის დროს აბაშიძეს დაუპირისპირდა და მის მითითებებს არ ასრულებდა,“- განაცხადა საქართველოს დემოკრატიული პრინციპების და ადამიანის უფლებების დაცვის კავშირის თავმჯდომარემ დავით ლოლუაშვილმა.

მისივე თქმით, აღნიშნილ საქმესთან დაკავშირებით მათ მიმართეს სახალხო დამცველს სოზარ სუბარს, რომელმაც დახმარება აღუთქვა.

ცნობისთვის: თამაზ ბაკურიძე სამართალდამცავებმა 8 აგვისტოს დააკავეს. მას ბრალად ედება გადასახადებისგან თავის არიდება, თანხის არამიზნობრივად გაფლანგვა, სამსახურებრივი უფლებამოსილების ბოროტად გამოყენება და სამსახურებრივი სიყალბე. ამჟამად თამაზ ბაკურიძე ბათუმის №3 საპყრობილეში იმყოფება.